Нæ зынаргъ уазджытæ! Нæ абоны урок бынтон хуымæтæг нæ уыдзæн. Иучысыл æндæрхуызон скодтам нæ куыст. Фараст азы дæргъы ирон æвзаг ахуыр кæнæм. Базыдтам ын йæ бирæ сусæгдзинæдтæ æмæ фæзилæнтæ. Базонгæ стæм æвзаджы æппæт хæйттимæ дæр: фонетикæйæ райдай æмæ синтаксисæй фæу. Абон мах бафæлвардзыстæм райгом кæнын ноджыдæр иу сусæгдзинад: æвзаджы равзæрд, куыд æхсæнадон фæзынд, куыд равзæрд бирæ æвзæгтæ, цавæр бынат ахсы иннæ æвзæгты 'хсæн ирон æвзаг, йæ абон æмæ йæ фидæны хъысмæт.

Æппæт уыцы фæрстытыл æрдзурыны тыххæй мах нæ тымбыл стъолмæ æрбахуыдтам алыхуызон специалистты, цæмæй уыдон бæлвырддæр радзурой, баххуыс нын кæной нæ куысты: биолог, географ æмæ дунеон аивадон культурæйы ахуыргæнæджы се æвзонг æххуысгæнджытимæ.

Диссаг вæййынц хатгай, нæ царды æппæты арæхдæр чи фембæлы, ахæм фæзындтæ. Зæгъæм, æвзаг… Ахъуыды-ма кæнут, уынджы уыл сæмбæлди æнæзонгæ адæймаг. Йæ былтæ байгом кодта, æмæ, рæуджытæй цы уæлдæф рацæуы, уымæй хурхыуадындзты, æвзаджы, былты фæрцы аразы алыхуызон мыртæ. Уæлдæфы змæлд уыцы мыртæ ахæссы алырдæм, æрбахæссы сæ сымах хъустæм дæр. Уыцы мыртæ фехъусгæйæ сымах райдайут æмбарын дзурæджы хъуыдытæ, йæ миддуне… Фæлæ сымах дис æппындæр ницæуыл кæнут, уымæн æмæ сахуыр стут уыцы фæзындыл, æрвылбоныл æмбæлут æмæ йæ хонут æвзаг.