"Без - Тукайлы халык" 3 нче сыйныф өчен сыйныфтан тыш чара

Укытучы: Гобәйдуллина Эльмира Азат кызы

Дәрес: сыйныфтан тыш чара

Сыйныф: 3 нче сыйныф

Тема:Без – Тукайлы халык

Максат: укучыларның Г. Тукай иҗатын, әсәрләрен белүләрен тикшерү; сөйләм

телләрен, фикерләү сәләтләрен үстерү; Г. Тукай иҗатына карата

кызыксыну, аның белән горурлану хисләре уяту

Җиһазлау: Г. Тукай портреты, “Ул – караңгы төндә яктырткан матур, ак тулган

ай” Ш. Бабич дигән сүзләр язылган плакат, магнитофон, магнитофон

язмалары, Г. Тукай әсәрләренә иллюстрацияләр, кроссворд,

сәхнәләштерү өчен җиһазлар.

Сыйныфтан тыш чараның барышы

- Исәнмесез, укучылар! Без бүген Г. Тукайның иҗатына һәм тормыш юлына багышланган әдәби кичәгә җыелдык. Ә кичәбезне кроссворд чишүдән башлап җибәрәбез.

1) Һәрвакыт авыз эчендә, ә йотып булмый /тел/

2) Кар астында кышлаган, тунын яшелдән тышлаган /уҗым/

3) Озын, яшел - түтәлдә, сары, тозлы - кисмәктә /кыяр/

4) Кеп-кечкенә җил капка ачыла да ябыла /авыз/

5) Кечкенә генә бер эт. Яткан да бөгерләнеп, тешләми дә, өрми дә, өйгә беркем

керми дә /йозак/

Сүзләр горизонталь буенча урнаша, вертикаль буенча Тукайдигән сүз чыга.

Беренче баганада нинди сүз килеп чыкты?

Тукай.

Тукай кем ул? Сез аның турында нәрсәләр беләсез?

Без сезнең белән Тукайны искә алу кичәсенә җыелдык. (шакылдаган тавыш ишетелә, Г. Тукай әкиятләренең геройлары керә)

Ана керә: - Ни кирәк? Кем бу? Кара төндә вакытсыз кем йөри?

Малай: - Су анасыннан котылгачтын, тынычлангач, әни

И орышты, и орышты, и орышты соң мине.

Мин дә шуннан бирле андый эшкә кыймый башладым,

Йя, иясе юк! – дип, әйберләргә тими башладым.

Сарык: - Әйдә, Кәҗә, куныйк бүген шунда барып.

Ут янына бүреләр дә килә алмаслар,

Безнең анда кунганлыкны белә алмаслар.

Кәҗә: - Әйдә, иптәш, ярар, барсак барыйк инде.

Укучылар, әйтегез әле, бу геройлар нинди әкиятләрдән, аларның эчтәлеген искә төшерик. (“Су анасы”, “Кәҗә белән Сарык” әкиятләренең эчтәлеген искә төшерү).

Укучылар, мин сезгә предметлар күрсәтәм, алар кайсы әкиятләрдән? (балта, тарак, ат, ярык бүрәнә, поднос)

Г. Тукайның тагын нинди әкиятләрен беләсез? Алар безне нәрсәгә өйрәтә?

Г. Тукай Шүрәлеләр, Су аналары турында язса да, аларның юклыгын да исбат иткән.

“Сабыйга” шигырен сөйләү.

Г. Тукай үзенең шигырьләрендә безне һөнәрле булырга, хайваннарны, кош-кортларны, Туган илне яратырга, белем алырга өнди.

“Кызыклы шәкерт” шигырен сәхнәләштерү.

Г. Тукай халык җырларын җыйган. Ул иҗат иткән шигырьләргә

композиторлар көйләр язган.

“Бала белән күбәләк” җырын балалар башкара.

Г. Тукай табигатьне, кош-кортларны да бик яраткан.

“Җир йокысы” шигырен сөйләү.

“Фатыйма белән сандугач” шигырен сәхнәләштерү.

“Карлыгач” җырын башкару.

Ә хәзер, мин сезгә Г. Тукай шигырьләреннән өзекләр укыйм, кайсы шигыреннән икәнен әйтерсез.

Күп тә үтми, бу бала куйды тәмамлап дәресне,

Куйды бер читкә җыеп дәфтәр, китапны – барсыны.(“Эш беткәч, уйнарга ярый”).

2) Иң элек бу тел белән әнкәм бишектә көйләгән,

Аннары төннәр буе әбкәм хикәят сөйләгән.(“Туган тел”).

- Шауламагыз, и балалар! Без җыярбыз барчасын,

Тиз ул алтыннарны амбарга төярбез барчасын.(“Яңгыр”).

Кырлар буш кала, яңгырлар ява,

Бу кайсы вакыт, я әйтеп кара!(“Җир йокысы”)

Без сөекле шагыйребезнең балалар өчен язылган әсәрләренә күзәтү ясадык. Укымаган шигырьләрен укырсыз, югары сыйныфларда да әсәрләре белән танышырсыз.

Г. Тукайның китаплары күргәзмәсе, әсәрләренә иллюстрацияләр күргәзмәсе белән эш.

Кичә “Туган тел” җыры белән тәмамлана.

Адрес публикации: https://www.prodlenka.org/metodicheskie-razrabotki/32099-beztukajly-halyk-3-nche-syjnyf-chen-syjnyft