Разработка мероприятия

Яхшылык җирдә ятмый.

Галимова Рәмзия Камил кызы

Балтач районы Кенә төп гомуми белем мәктәбе

Максат: 1. Яхшылык эшләүнең изге гамәл икәненә төшендерү.

2. Баланың үз адымына нәтиҗә ясый белүенә ирешү.

3. Яхшы күңелле, эчкерсез балалар тәрбияләү.

Класс сәгатенең барышы:

Оештыру өлеше.

Теманы ачу.

Укытучы: Исәнмесез, балалар. Безгә бүген кунакка аю килгән. Исәнме, аюкай!

Аю: Исәнмесез!

Укытучы: Син ни өчен шулай күңелсезләнеп йөрисең? Нәрсә булды?

Аю: Мин хыялланам.

Укытучы: Нәрсә турында хыялланасың? Безгә дә сөйлә әле. Синең хыялыңны балалар рәсемгә төшерер.

( Балалар алдында зур кәгазь һәм фломастер куела. Аю сөйләгәндә һәрберсе аерым берәр предмет ясап бара. Бу рәсем тактага эленә)

Аю(үзенең хыялын сөйли): Юлдан килгәндә бер агач күрәм. Агач янында бал кортлары да юк. Алар еракта-еракта очалар. Мин шул агачтан күп итеп бал алдым. Агач төбенә яттым да, көне буе туйганчы ашадым. Хәтта эчем дә авырта башлады. Тирә-якта матур чәчәкләр үсә. Бик рәхәт!

Укытучы: Синең хыялың бик матур икән. Ләкин син үзеңә яхшы булсын өчен генә хыяллангансың.

Аю: Нәрсә, әле мин башка кеше өчен дә хыялланырга тиешме?

Укытучы: Үзеңә рәхәт булсын өчен генә яшәмиләр. Кешеләргә дә рәхәт,яхшы булсын өчен тырышырга кирәк.

Класс сәгатенең темасын уку.(тема тактага эленә,балалар бергәләп укыйлар)

Балалар: Яхшылык, җирдә ятмый.

Укытучы: Балалар,сез яхшылык эшләүне ничек аңлыйсыз? (Балаларның җавабы тыңлана). Аюкай ишеттеңме? Укучылар яхшылыкдигән сүзнең нинди мәгънәләргә ия икәнен бик әйбәт беләләр икән. Бер-береңнең күңелен күтәрү өчен матур сүзләр әйтү дә җитә.

Уен “Тылсымлы урындык”. (урындык матур итеп бизәлә) (Бер бала урындыкка утыра, башка балалар аның яхшы якларын әйтәләр.

М-н: Алсу-тырыш, матур, тәртипле, әдәпле һ.б)

Аю: Мин сезнең уеныгызны карап, хыялга бирелеп утырам .Чынлап та кешенең күңелен күтәрү өчен күп кирәкми икән. Сезгә үземнең яңа хыялымны сөйлим әле (Аю икенче хыялын сөйли). Агач төбендә бал ашап ята идем. Карыйм, агачның бер ботагы сынган, мин аны бәйләп куйдым. Икенче якка караган идем, елганың суы акмый. Мин аны да чистарттым. Кошлар һәм җәнлекләр рәхәтләнеп чиста су эчсеннәр, куансыннар.Аларның куанганнарын күрү миңа да рәхәтлек бирде. (Балалар рәсем ясыйлар, рәсем тактага беркетелә)

Укытучы: Балалар, әйдәгез тактадагы ике рәсемне чагыштырыйк әле. Сезгә аеруча кайсы рәсем ошады һәм ни өчен? (балаларның җаваплары тыңлана)

Ә хәзер “Тылсымлы чәчәк” уенын уйнап алырбыз. Күзләрегезне йомыгыз һәм яхшылык турында уйлагыз (музыка уйный). Сез чәчәк таҗын өзеп алыгыз һәм үзегезнең хыялыгызны әйтегез.(һәрбер бала үзенең хыялын сөйли).

Кояш рәсемен ясау.

(Тактага кояшның түгәрәге беркетелә, балалар алдында кояш нурлары, нурларга яхшы һәм начар сүзләр язылган. Балалар яхшы сүзләр язылган нурларны сайлап алалар һәм тактадагы кояшка беркетәләр).

Йомгаклау.

Балалар, сезне шушы яхшылык нурлары гел яктыртып, җылытып торсын. Кояш кебек гел елмаеп торыгыз. Кешеләрне,әти-әниләрегезне,туганнарыгызны үзегезнең яхшы гамәлләрегез белән куандырып яшәгез. Исән булыгыз!

Адрес публикации: https://www.prodlenka.org/metodicheskie-razrabotki/42171-razrabotka-meroprijatija