Сценарий на марийском языке «Колат мо йукемым, Айдеме?» ( «Слышишь ли ты меня, Человек?»

Муниципальный общеобразовательный учреждений

«Красногорский икымше номеран кыдалаш школ»

Шочмо вер-шӧрлан пӧлеклалтше сценарий

Возен:

МОУ «Красногорский 1-ше номеран школын»

марий йылмым туныктышыжо

Фадеева Татьяна Геннадьевна.

пгт Красногорский

2019 ий

Сценарий.

Колат мо йӱкемым, Айдеме?

Шочмо-кушмо веремын чеверже,

Курым мучко чапланыше эҥер,

Тыланет лийже тиде муремже,

Моктыдегыч ом керт мый чытен.

Модшо-влак:

Ольга Владимировна- класс вуйлатыше

Оксиня – староста

Ануш – культорганизатор

Диана – отличник ӱдыр

Викуш – сайын тунемше

Качырий – сайын тунемше

Йыван – удан огыл тунемше

Элыксандр – кокытанлан тунемше

Йогор – осал рвезе

1 ужаш.

Школысо историй кабинет. Пырдыжлаште тӱрлӧ сынан плакат-влак кечат. Доска яндар, классысе часлан ямде. Тудын пурла велныже мотор гына пеледыш пӧлемым сӧрастара. Чыла тунемше парт коклаште шинчат, туныктышым вучат. Тиде жапыште кабинетыш класс вуйлатыше Ольга Владимировна пурен шогале.

Ольга Владимировна. Пагалыме йоча-влак, таче тунемме ий мучашлалтеш, садлан ты вашлиймашна пытартыш лийын кертеш. Классысе часна пӱртӱс дене кылдалтеш, молан манаш гын кеҥежым каныш жапдам те пӱртӱс лоҥгаште эртареда.

Пӱртӱс! Ты мутым каласымек, шинча ончылнына шурно пасу, тӱрлӧ пушеҥган чодыра, ял покшеч, пасу гоч, пич чодыра вошт лыкын-лукын кадыргыл йогышо изи да кугу эҥер-влак, левыктен опталме ший гай волгалтше яндар вӱдан ер-влак сӱретлалтыт. Пылышлан пеледыш гыч пеледышыш чоҥештылше мӱкш-влакын ызгымышт шокта. Вӱд воктенысе арама ден моло лышташан пушеҥге-шамыч коклаште тӱрлӧ кайыкын сӧрал семышт йоҥгалтеш. Нуным колыштатат, уло шӱм-чонет шула, кап-кылет кана.

Тунемше-влак, айста пырля жапым эртараш походыш миен толына, шочмо-кушмо вер-шӧрнан моторлыкшым, сылнылыкшым шке шинча дене ужына, эскерена!

Тунемше-влак.Айста, айста каена!!!

Ольга Владимировна. Но мыйын эн ончыч тыгай йодыш лектеш: «Кушко те кайынеда?»

Оксиня.Айста мемнан яндар вӱдан Ошла энер деке!

Диана.Мый тореш омыл!

Йыван.Мыят!

Ольга Владимировна. Тугеже эрла индеш шагатлан школ воктене погынена. Келшеда!?

Тунемше-влак. Келшена! Келшена!

2 ужаш.

Тунемше-влак индеш шагат эрдене чылан погынышт. Ошла эҥер деке, веселан мутланен, ошкыльыч. Миен шумеке, вигак верланаш тӱҥальыч.

Диана. Мый кочкаш шолтем!

Элыксандр. А мый пулан миен толам!

Качырий.А ме: Йыван, Ануш, Викуш да Оксиня дене палаткым шогалташ тӱҥалына. Йогор, тый молан мыланна от полшо? Пушеҥге укшыжым молан кӱрыштат, молан от чамане? Пушеҥге илынеже, кушнеже, шке моторлыкшо дене мемнан шинчанам куандарынеже.

Йогор. А мыламже мо? Илыже, кушшо, мый тудлан чаракым ом ыште!

Ольга Владимировна. Йоча-влак, пӱртӱс деке тыгай йӱштӧ кумылан ида лий. Тудым чаманаш, аралаш да йӧраташ кӱлеш! Тыгак кертме семын полыш кидым шуялташ ӧрканыман огыл! Айста йырваш улшо пӱртӱсым эскерен ончена!

Йогор.А мом тыште ончашыже? Мо тыште улыжо? Мый гын нимомат ом уж!

Викуш.Мылам гын чодыра лоҥгаште кайык мурым колышташ келша!

Элыксандр. А мый яндар вӱдан эҥерыште йӱштылаш йӧратем, шке кап-кылемым тыге кандарем.

Качырий. Шинчамым мотор, сылне пеледышан ужар олык куандара.

Оксиня. Мый ший вӱдан эҥерын шоргыктен йогымыжым колышташ йӧратем!

Йыван. Мылам канде каваште пыл-влакын иймыштым эскераш келша, тушто тӱрлӧ янлыкын сӱретыштым ужаш лиеш.

Ануш.А мый пӱртӱсым сӱретлаш йӧратем! Эше пӱртӱс нерген шуко мурым палем. Поснак Г. Григорьевын «Ош куэ» мурыжо моткоч келша.

Чылан ты мурым мурат. Йогор гына огеш муро, чылаштым осалын, шыдын ончен шинча.

Диана. Айста йӱштылаш каена!!! Вара футболла модына!!!

Чылан йӱштылаш куржыч. Йӱштылмӧ годым тунемше-влак коклаште ӱчашымаш лекте.

Ольга Владимировна. Айста эҥер гыч чыла торым серыш луктын кышкена! Тыге вӱдым яндарракым ыштена!!!

Тунемше-влак рӱжге пашалан пижыч, Йогор веле ӧрдыж гыч ончен шога. Полшымо олмеш, мӧҥгешла, пушеҥге гыч кӱрыштмӧ укшлажым эҥер вӱдыш кышка.

Ӱдыр-влак. Ольга Владимировна! Ончалза, мом Йогор ыштылеш!?

Ольга Владимировна. Йогор, тый, пожалуйста, умыло: эҥерым тыге лавыраҥдаш огеш лий, молан манаш гын тыге кажныже ышташ тӱҥалеш гын, вараже мо лиеш, палет!? Нигуштат яндар вӱд ок код, лавыраҥше вӱдым йӱаш тӱҥалат мо? Вует йыр шоналтен ончо-ян!

Йогор. Те мыйым чыланат вурсаш огыда тӱҥал гын, вашталташат ямде улам!

Качырий.Вот, Йогор, тыге кӱлеш шол! Кызытак мыланна полшо, ме тылат мом ыштышашым каласена.

Чынжымак, Йогор вигак пашалан пиже: мом йодыт, чыла ыштен пуа. Пашам пытарымеке, чыланат кочкаш шинчыч. Кочмо годым пӱртӱс нерген тыгай мутланымаш лекте.

Йогор. Паледа мо, айста эше иктаж-кунам тыге походыш каналташ миен толына!

Ольга Владимировна. Айста!

Оксиня. Чодыра воктеке каена!

Элыксандр. Туштыжо мыланна эше оҥайрак лиеш манын, шонем.

Йыван. Чынжымак, яндар юж дене шӱлалтена, уда укшлам, шӱйшӧ пушеҥге-влакым чодыраште кораҥдена, шылмыла модына, вара йӱштылаш каена.

Викуш. Тиде пеш сай шонымаш!

Диана. Эше классыштына пӱртӱсым аралыше да эскерыше комитетым почына. Тудын моторлыкшым, сылнылыкшым шымлаш, перегаш тӱҥалына. Келшеда?

Чылан. Туге, келшена!!!

Ольга Владимировна. Мый тендан дене кугешнем! Айста комитетын лӱмжӧ тыге йоҥгалташ тӱҥалеш: «Колат мо йӱкемым, Айдеме?»

Ануш. Мыйын шонымаште, пӱртӱсым аралыше комитетым шукертсек почаш кӱлеш ыле!!! Но нимат огыл, таче кече гыч тӱҥалына, чылажымат дневникыш возена!!!

Чыла тунемше ты комитетыш возалте. Нунын ончылнышт кеҥеж мучко пеш кугу паша палдырнен: пӱртӱсым эскераш, шымлаш, моло-влакымат тудым аралаш, чаманаш, утыр сылнештараш кумылаҥдаш. Тыгак пӱртӱсын моторлыкшо дене кугешнен мошташ.

Мучаш.

Адрес публикации: https://www.prodlenka.org/metodicheskie-razrabotki/441858-scenarij-na-marijskom-jazyke-kolat-mo-jukemym