Білімдіден шыққан сөз Талаптыға болсын кез. Нұрын, сырын көруге Көкірегінде болсын көз

Оқушылардың білім сапасын арттырудың алғы шарты –саналы тәрбие.

Р.О. Молдакадырова, қазақ тілі мен әдебиеті пәнінің мұғалімі.

Ақтау қаласы №2 орта мектебі.

«Білімдіден шыққан сөз

Талаптыға болсын кез.

Нұрын, сырын көруге

Көкірегінде болсын көз»

Абай

Тәрбие – қоғамдық үрдіс, қоғамның және жеке тұлғаның арақатынасын қамтамасыз ететін басты жүйе. Біздің тәуелсіз елдің болашақ ұрпағы тәрбиеден ғана рухани байлық алып, тәрбие нәтижесінде адам болып қалыптасады. Бүгінгі таңда тиянақты білім беру жұмысында тәрбие жұмысын дамыту басты мақсат болып отыр. Мұғалім мен мектептің ең қасиетті міндеті – рухани бай, жан – жақты дамыған, жеке дарынды тұлғаны зерттеп, дамытып, қалыптастыру. Болашақты дамытып, тәуелсіздікті нығайтатын ұрпақ алдымен рухани ұлттық тәрбие нәрімен сусындауы қажет. Рухани байлық дегеніміз - әр халықтың ұлттық әдет – салты, әдебиеті, мәдениеті, өнері, шыққан түп тамыры. Осы ұлттық байлықты бүкіл адамзаттың өз ұрпағын тәрбиелеудегі ұстанымдармен байланыстыра отырып, әр баланың қабілетін, талантын ашу, өз - өзіне сенімін нығайтып, өзіне өзінің жол ашуына түрткі жасау – бүгінгі тәрбие ісінің басты міндеті.

Егеменді еліміздің жарқын болашағы болар жас ұрпаққа терең мазмұнды білім беру мен ұлтын сүйер патриот азамат етіп тәрбиелеу бүгінгі алға қойған басты міндет. Ертеңгі ел тізгінін ұстар азаматтар – бүгінгі мектеп оқушысы. Мектеп оқушысын тәрбиелеу мәселесінің негізгі өзегі - өмір тәжірибесі, өз халқының әдет-ғұрпы. Жас ұрпақты Отанының патриоты ретінде тәрбиелеуді мақсат еткен әрбір ұстаз ақиқат пен аңыздың асқарында ғұмыр кешкен Бауыржан Момышұлы атамыздың мына сөзін жанында ұстағаны жөн:

«Жаудан да, даудан да қорықпаған қазақ едім, енді қорқынышым көбейіп жүр. Балаларын бесікке бөлемеген, бесігі жоқ елден қорқамын. Екінші, немересіне ертегі айтып беретін әженің азаюынан қорқамын. Үшінші, дәмді, дәстүрді сыйламайтын балалар өсіп келеді. Солардан қорқамын», - деген атамыздың осы қорқынышын болдырмайтын, бесік жыры үнінің құдіретіне тәнті болып өсетін баланың тәрбиеленуіне, ертегіні құмарта тыңдап, оның қызығына тамсана білетін жеткіншектің көбеюіне, дәстүрімізді сыйлайтын намысты ұл мен қыздың өсуіне тірек болатын тәрбие жұмысы ұлттық мінез, ұлттық келбетіміздің ажарлануына жол ашады.

Мектеп –білім, тәрбие ордасы, тағылым табалдырығы. Мектеп – тұлғаның толық қалыптасуына жағдай жасайтын әлеуметтік орта. Әр жеткіншек – зерттелмеген құпия. Сол зерттелмеген құпияны ашып, баланың басқаға ұқсамайтын қасиеттерін тани білу –ұстаз атаулыға үлкен салмақ салып отыр.

Елбасы Н.Ә.Назарбаев:»Болашақта еңбек етіп, өмір сүретіндер –бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан мұғалімге жүктелетін міндет ауыр»,- деген болатын. Ендеше елдің ұлтжанды азаматын тәрбиелеймін деген кез келген ұстаз, тәрбиеші ұлттық мәдениетті, тарихи мәдени мәліметтерді және ата-баба мұраларын тәрбие ісіне іргетас етуі қажет.

Мектеп оқушыларының бүгінгі білімі – ертеңгі капиталы болатындай, ал қазіргі тәрбиесі –қазақтың қадірлі қасиеттерін қастерлей білетіндей болуы тиіс.

Дербес Қазақстан мемлекетінің ертеңгі болашағы –бүгінгі ұрпақ тәрбиесіне тікелей тәуелді. Өскелең ұрпақтың рухани жан дүниесін білім нәрімен сусындатып, халқының ерте заманнан жинақталған асыл мұрасымен байытып, Абайша айтқанда «көкірек көзін оята тәрбиелеу» ата-анадан басталып, мектепте жалғасып, бүкіл қоғам болып ат салысатын жауапты міндеттердің ең бастысы.

Адрес публикации: https://www.prodlenka.org/metodicheskie-razrabotki/34904-bilimdiden-shyan-sz-talaptya-bolsyn-kez-n