Сценарий на 9 мая в подготовительной группе

СЦЕНАРИЙ 9 МАЙЫ ЦÆТТÆГÆНÆН КЪОРДЫ.

Хъ.: Нæ уыдзысты сæ нæмттæ махæй рох, Сæ кад цæуы, тырысайау, нæ разæй, Лæгмартимæ ныфсхастæй кодтой тох, Фыдæлты бæстæ бахыстой знагæй. Æмæ ныр мах – сæ фидæны фæлтæртæ – Сæ намысæй бæрзонд хæссæм нæ сæртæ!

Уæ бон хорз нæ зынаргъ уазджытæ. 81 азы размæ фæцис Фыдыбæстæйы стыр хæст. Абон зæрдæбынæй арфæ кæнæм нæ Райгуырæн бæстæ нын чи бахъахъхъæдта, нæ зæххыл нын сабырдзинад чи ныффидар кодта, уыцы салдаттæн æмæ ветерантæн.

Самира : Уæлахизы бон, - Нæ цины бæлон,Нæ Фарæстæм Май

Æгас нæм цæуай!

Ды фарн æрхастай, НæФарæстæм Май!

Нæ уалдзæджы хай,

Сæрибары май.

Алана Б. Ды дæ мæ уд, мæ бæрæгбон,

Фыдыбæстæ, дæуæй

Мæнæн зынаргъдæр, адджындæр, Нæ уыди æмæ нæй!

Нæ фыдæлтæ сæ хъарм тугæй

Дæу балхæдтой, мæ зæхх,

Сæ бæркадджын фæллойæ дæ

Ысбуц кодтой дзæбæх.

Æмæ дæ никуы ратдзынæн Ызнагæн, зон уый ды. Фæлтау мæлæт ссардзынæн

Дæ сæрвæлтау хæсты!

Анна К. Уӕд ӕрыгӕттӕй цыдысты хӕстмӕ...

Цард фыдыбӕстыл нӕ кодтой 'вгъау
Даргъ цыппар азмӕ цыдысты тохы фӕзмӕ...
Рухс зӕрдӕты ныфс уыди егъау.

Алана М. Тӕригъӕд, стонг ӕмӕ адзалӕй
Бонтӕ йедзаг кодтой ӕваст
Знаджы ныццӕгъдын цыфӕнды мадзалӕй
Нысантӕ ӕвӕрдтой сӕ разы уӕд раст.

Дана. Сгуыхтдзинад равдыстой
Иры лӕппутӕ
Уӕлахиз ӕрбакодтой тугӕй хӕстӕг
Фыдгулы ныххурх кодтой, сбастой йӕ къухтӕ!
Сӕ фӕрцы ис махӕн сӕрибар рӕстӕг!

Зарæг «Уæлахизы бон».

Под звук хронометра проводится минута молчания.

Хъ.: Германы ныббырст уыдис тынг ӕвирхъау хабар. Уыцы сӕрдыгон бонты скъола чи фӕци, уыцы чызджытӕ ӕмӕ лӕппутӕ сӕхи цӕттӕ кодтой дарддӕр ахуыр кӕнынмӕ институттӕ ӕмӕ университетты. Фӕлӕ карз хӕст уыцы пълӕнттӕ фехӕлдта. Ӕмӕ зноны сывӕллӕттӕ сӕ къухтӕм чингуыты бӕсты райстой хӕцӕнгӕрзтӕ, уӕхскӕйуӕхскмӕ ӕрлӕууыдысты знаджы ныхмӕ.

• Зӕххыл цы стырдӕр хӕст ӕрцыд, уым ирон туг дӕр ныккалд. Стыр Фыдыбӕстӕйы Хӕстмӕ Цӕгат Ирыстонӕй ацыд 95 мин адӕймаджы. Се' рдӕг фӕстӕмӕ нал сыздӕхтысты.

• Адӕм сыстадысты знаджы ныхмӕ ӕмӕ тох кодтой хӕсты быдыры. Райдыдта карз хӕст ӕмӕ хъӕбатыр ирон лӕппутӕ ӕмӕ чызджытӕ араст сты сӕ къонатӕй, хӕрзбон загътой сӕ бинонтӕн, сӕ ныййарджытӕн. Ахӕм хъӕу, ахӕм мыггаг ӕмӕ хӕдзар нӕ уыд, хӕсты цӕхӕр кӕй нӕ басыгъта. Ирыстоны хъӕбултӕ ӕвдыстой лӕгдзинад ӕмӕ ӕхсардзинады дӕнцӕг, ныййарӕг мады фӕдзӕхст сӕрыстырӕй ӕххӕст кодтой, Райгуырӕн зӕххы сӕраппонд бырстой знаджы ныхмӕ ӕмӕ ӕгаддзинад сӕ сӕрмӕ нӕ хастой.

Анна С.: Æмдзæвгæ «Цырты раз», Уырымты Петя

Нӕ сыхӕй заргӕ карз тохмӕ фӕцыд,

Фӕлӕ фӕцух ӕнахъомӕй ӕмгӕрттӕй, Кӕйдӕр зӕххыл ныр сыстади йӕ цырт.

Сӕрибарыл ныггуыпп ласта йӕ зӕрдӕ…

Хъ.: Мӕскуйы, Сырх Фӕзы ис ахӕм мемориал – «Ӕнӕном салдаты ингӕн». Уым ӕвӕрд ӕрцыд хуымӕтӕг салдат, йӕ цард Райгуырӕн зӕххы сӕраппонд чи радта, Стыр Фыдыбӕстӕйы Хӕсты немыцаг фашисты нӕмыгӕй чи фӕмард, уый.

(Равдисын мемориалы къам)

- Чи уыд, кӕмӕй уыд, кӕцон уыд – уый ничи зоны. Уымӕн ӕй хонынц «Ӕнӕном». Ӕмӕ ахӕм ӕнӕном салдаттӕ цас ӕмӕ цас фӕмард уыцы ӕгъатыр хӕсты быдыры. Сӕ нӕмттӕ сын абон дӕр нӕ зонӕм. Фӕлӕ махӕй никуы ферох уыдзӕн, уыдон сӕ цард мах тыххӕй кӕй радтой, уый. Уыцы ингӕнты раз сӕрдӕй-зымӕгӕй, ӕхсӕвӕй-бонӕй судзы ӕнусон арт. Уыцы арт нысан кӕны Фыдыбӕстӕйы хъахъхъӕнджыты сгуыхтдзинӕдтӕ адӕмӕй кӕй никуы ферох уыдзысты ӕмӕ сын кӕдфӕнды дӕр кад кӕй кӕндзысты.

Æмдзæвгæ «Æнæном салдат», Цæрукъаты Валодя

Заур: Кæмæй уыд, кæцон уыд,

Кæм бæсты цæрæг,

Уырыссаг, ирон уыд, - Нæу уый дæр бæрæг.

Æмæ йæ кæд хонæм

Æнæном салдат, Уæддæр æй мах зонæм, Кæмæн кæнæм кад:

Астан: На бæсты сæраппонд Уый райста мæлæт, æмæй нæм уа абон Æнæмаст цæуæт.

Йæхæдæг кæцон уыд,

Кæм бæсты цæрæг,

Уырыссаг, ирон уыд,

Нæу уый дæр бæрæг…

Хъ.:- Сабитæ, иугыццыл куы ахъазиккам, уый мæ фæнды. Разы стут? Фæлæ нæ хъæзтытæ дæр абон уыдзысты хæстон темæимæ баст. Фыццаг хъазт хуыйны «Адæтт сармадзаны нæмыг».

- Æрлæудзыстут иу рæнхъæй. Фыццаг чи лæууа, уый раз уыдзæн чыргъæд гыццыл пуртитимæ, уыдон уыдзысты «нæмгутæ». Фæстаг чи уа, уый раз та лæудзæн афтид чыргъæд. Сымах хъуамæ «нæмгутæ» иу чыргъæдæй иннæмæ адæттат. Хъазт цæудзæн, цалынмæ пурти«нæмгутæ» сеппæтт дæр нæ адæттат, уæдмæ. Алцы дæр бамбæрстат? Уæдæ райдыдтам!

Хъазт «Адæтт сармадзаны нæмыг»

Хъ.: Иннæ хъазты та уыдзыстæм танкисттæ. Залы астæу уын сæвæрдзыстæм тæлытæ – уыдон уыдзысты уæ «танктæ», цалынмæ музыкæ зæла, уæдмæ сымах тæлыты алыварс згъордзыстут. Куыддæр музыкæ фæхъус уа, афтæ уæ алчи дæр хъумæ бацахса иу «танк» - алæууа тæлыйы астæу. Æнæ «танкæй» чи баззайа, уый хъазтæй ахиздзæн, цæттæ стут? Райдыдтам!

Хъазт «Танктæ»

Хъ.: - Зӕронд ныййарӕг мад сӕркъулӕй лӕууы айнӕг къӕдзӕхы рӕбын. Йӕ сӕрмӕ та уӕларвы тӕхынц авд хърихъуппы. Уыцы ныййарӕг у Тасо, хърихъуппытӕ та сты йӕ авд хъӕбулы, йӕ авд фырты: Мӕхӕмӕт, Дзӕрӕхмӕт, Хаджысмел, Махарбег, Созырхъо, Шамил ӕмӕ Хасанбег.

(Равдисын цыртдзæвæны къам)

- Хӕст куы райдыдта, уӕд уыдонӕй иу дӕр хӕдзары нӕ баззад ӕмӕ иууылдӕр ацыдысты фронтмӕ. Фӕстӕмӕ та сӕ иу дӕр нал ӕрыздӕхт.

Авдӕй дӕр баззадысты уыццы ӕгъатыр хӕсты быдырты.

Кафт зарæг «Журавли»-мæ гæсгæ (чызджытæ)

Хъ.:-Алы адӕймагӕн дӕр зынаргъ сты йӕ бинонтӕ дӕр, йӕ мад дӕр, йӕ цард дӕр. Фӕлӕ знаг ныййарӕг зӕхмӕ куы ӕрбалӕбуры, уӕд адӕймаджы ӕрбайрох вӕййы йӕхи цард ӕмӕ Райгуырӕн бӕсты бахъахъхъӕныны тыххӕй тохы бацӕуы.

- Никуы ферох уыдзысты адӕмӕй Ирыстоны сахъгуырдтӕ хӕсты цы сгуыхтытӕ равдыстой, уыдон. Ӕмӕ мах абон сӕрыстыр стӕм нӕ хъӕбатыр ӕмбӕстӕгтӕй, хӕсты быдыры лӕгдзинад чи равдыста, сӕхицӕн ӕмӕ Ирыстонӕн кад ӕмӕ ном чи скодта, уыдон

Хъазт «Перевязать раненного солдата».

Зарæг «Катюша»

Милана Арвы егъау цъæхыл – хурæн йæ цæст.

Ма рцæуæд а зæххыл макуы уал хæст.

Бæстæтæ сабыргай дзурæнт æдзух

Сабитæ ахуырæй ма кæнут цух!

Хъ.:Зынаргъ уазджытæ, иу хатт ма уын зæрдиаг арфæ кæнын Рухс Уæлахизы бæрæгбоны фæдыл. Æнæниз æмæ амондджын ут! Нæ иннæ фембæлдмæ!

Зарæг «Катюша».

Дидин ракалдтой кæрдо, фæткъуытæ.
Доны сæрты ленк кæны æврагъ.
Бæрзонд къардиумæ рацыди Катюшæ,
Цæугæдоны сæрмæ раст куыд маргъ

Рацыд æмæ зарджытæ ныззарыд
Быдираг гæрæмтæ цæргæсыл.
Йæ уарзон лæппуйы тыххæй зарыд
Уыцы сагсуры фыстæджытыл.

Ацы зарæг, ацы чызджы зарæг,
Атæх худгæ хуры фæстæ тагъд.
Æмæ сахъгуырдæн дард арæнтæм ахæсс
Уарзон чызг Катюшæйæ салам.

Уыцы лæппу уадз йæ зæрдыл дарæд
Уарзæгой чызджы хъуытаз хъæлæс.
Уадз æмæ цæуа нæ бæстæ хъахъхъæд,
Уарзондзинад чызджы бар фæуæд!

Дидин ракалдтой кæрдо, фæткъуытæ.
Доны сæрты ленк кæны æврагъ.
Бæрзонд къардиумæ рацыди Катюшæ,
Цæугæдоны сæрмæ раст куыд маргъ.

УÆЛАХИЗЫ БОН

Рухс Уæлахиз, о куыд дард нæм уыд, куыд тынг,

Раст, цыма, фæнычы бамынæг и зынг.

Сыгъд фæндæгтыл размæ, размæ уыд нæ каст, –

Кодтам уыцы бон уæхскæй-уæхскмæ æввахс.

Базард: (припев:)

Уыцы Рухс Уæлахиз –

Хъусхостæф, фæсус.

Уаз бæрæгбон,

Фæлæ къæмисæнтæ – урс.

Уыцы уаз цин, –

Уый цæссыгæхсад у – рухс.

Рухс Уæлахиз! Рухс Уæлахиз! Рухс Уæлахиз!

‘Хсæвæй-бонæй сыгъд мартенты риуы арт,

Фыдыбæстæн не ‘сси иу æрцъынд фадат.

‘Хсæвæй-бонæй карз тох амадтам ныфсхаст, –

Кодтам уыцы бон уæхски-уæхскæй æввахс.

Базард: (припев:)

Уыцы Рухс Уæлахиз –

Хъусхостæф, фæсус.

Уаз бæрæгбон,

Фæлæ къæмисæнтæ – урс.

Уыцы уаз цин, –

Уый цæссыгæхсад у – рухс.

Рухс Уæлахиз! Рухс Уæлахиз! Рухс Уæлахиз!

Байрай, гыцци, не ‘ппæт не ‘рцыдыстæм мах...

‘Ртæхдзаст нæууыл ма бæгъæввадæй ыстæх!

‘Рдæг Европæ, зæххы ‘мбис – нæ къахæй барст,

Кодтам уыцы бон уæхски-уæхскæй æввахс.

Базард: (припев:)

Уыцы Рухс Уæлахиз –

Хъусхостæф, фæсус.

Уаз бæрæгбон,

Фæлæ къæмисæнтæ – урс.

Уыцы уаз цин, –

Уый цæссыгæхсад у – рухс.

Рухс Уæлахиз! Рухс Уæлахиз! Рухс Уæлахиз!

Адрес публикации: https://www.prodlenka.org/metodicheskie-razrabotki/640993-scenarij-na-9-maja-v-podgotovitelnoj-gruppe