Ёвтнема «Кода мон тонавтнинь правила»

Кода мон тонавтнинь правила.

Шказо обедтэ мельксэль. Мон уставинь анокстамо сыця чис кудонь заданиян. Тетям аштесь мадезь диван лангсо ды налксесь налксемасо монь телефонсон.

- Тон кодамо уровнясоят? – кевкстия.

- Остатка.

- Вулкан лангсоят. Зяро алмазот?

- Ламо.

Учовсь авамгак роботасто. Сон ёроков эскельксэ совась, варштась минек пелев ды укстась : «Кода свал…»

Мон чарькодинь, авам таго музгорди тень лангсо, што минь тетянь марто эзинек уряда столь лангонть. Тосо кшинь паморькст, апак ваньскавто пенчт – вакат. Тетянь вакссо чайде симемадо мельга апак шля бокал. Монь столь лангсон истямо жо мазычи: ве ёно чипсат, омбоце ёно – бокал ведь марто.

- Аволь велесэ эрятано. Скотина андомс а эряви. Тыненк жо кавто вакатнэяк а шлявить. Арази паро улемс истямо нузяксокс, - ушодызе авам моронзо (истя тетям корты).

Тетям прок эзь маряяк. Монень жо теевсь виськс ды мон меринь - Авай, мон нейке шлясынь , - ды сыргинь тевень тееме.

- Течи мон чокшне а улян, - ванан уставась кортамо авам тетянь марто.

- Те мекс истя? Ды ков истя арсят оргодеме?- телефононть эйстэ прянь апак кепеде кевкстсь тетям.

- Монень максть тердема конёв концертс. Карми налксеме фортопьянасо Антон Горунов – россиянь лауреат, пек паро пианист. Молят мартон? – кевкстсь теке марто авам.

Содан кевкстизе истяк, илязо тетям обидяво, што авам моли сонстемензэ.

- Тон парсте содат, мон истят концерт а вечкан, - нузяксто таргинзе валонзо тетям.

Тетянь мон пек чарькодьса. Седе паро бу улевель кирнявтнемс батут лангсо ды ярсамс пиццадо эли роллдо. Сестэ монгак молевлинь. А ней… Аштек озадо ды учок зярдо сы песь. Мейле ансяк авам рами мезеяк тантейне кафэстэ (мон весть ульнинь истямо концертсэ авань марто).

- Венстик монень дневникеть, - мерсь авам, зярдо мон озынь столень экшс.

Мон чиртия кургом, дневникенть ялатеке максыя.

- Кавто! Пек паро!- пижагадозь ладсо мерсь авам, - Мезень кис?

- Правиланть эзия тонавтне, - пелезь уставинь мон идеме эсь прям ды секе марто поладынь, - оймак, иля тално, Лиля Наильевна те шнамонть журналс эзизе путо.

- Монень а мезть талномс. Талнок тон. Арсят прядомо школат справка марто? Ков мейле молят?

- Карман велесэ бабань ладсо сеянь трямо, - меринь мон, апак арсе.

- Паро, - мерсь авам ды поладызе, арсезь, кортамонзо,- Ды кие соды, паряк паро мирде теть понги велесэ, аволь кода монень – тюлень, - кепедизе вайгелензэ остатка валонть ёвтамсто.

Ансяк тетям муркак эзь тее.

- Вандыс правилась улезэ тонавтнезь!

- Вандынень уш лия максть.

- Сестэ тонавтнесы кавонест, а тон, чевте таркань азор, – велявтызе авам прянзо тетянь пелев, - уш контролировик те тевенть ды ушодсь оршнеме концертс.

***

- Кода паро, што авам течи концертсэ, а тетям, тетям – телефонсо, – арсинь мон. Куроке тейсынь заданиян ды карман налксеме Контаксо вечкевикс налксемасон . Мезе, интересна, тосо монь полавтовсь течи.

Ансяк стяко мон истя арсинь.

Зярдо мон решинь весе кудов максозь примертнэнь, тетям васняяк парсте ванынзе. Ансяк мейле уставинь сёрмадомо сынст тетрадьс. Мейле теия рузонь кельсэ упражнениянть. Ловныя Александр Блоконь стихотворениянзо. Нолдыя лексема коштом: «Окойники! Весе уроктне анокт!»

Тетям истя жо мадезель диван лангсо. Содынь, сон пачкодсь уш остатка уровняс. Тосо ульнесть и лучникть и капитант, великант ды даже магт. Тетянь воёвицянзо виевгадсть. Содан, сонзэ уш ламо алмазонзо ды ней сон рамси, мезе мелезэ. Моньгак пек ульнесь мелем улемс те уровнясонть. Мон сельмень сявадозь варштынь тетянь лангс. Сон прясто пильгс налксемасоль.

«Кадык налкси», - ойминь. Панжия ноутбуконть, совинь Контактс, муия вечкевикс налксемам ды тесэ…(эзинь кенере устава налксемеяк) вишка мазый алашинем прок кортазевсь тетянь вайгельсэ:

-Правиланть тонавтник?-

- Кодамо правиланть? – абунгадынь мон кавто мирэнь ки лангсо аштемстэ.

- Конань максызь тонавтнемс вандынь рузонь келень уроконтень, - вайгельсэнзэ велявтызе тетям прям мода лангонь мирс, виртуальной мирэнть лангс ваномсто.

- Пекстык ноутбуконть, панжик книганть ды тонавтнек, - окойники кепедизе прянзо тетямгак телефононть эйстэ ды пштистэ варштась витьстэ сельмезэнь.

Содынь, истямо вановтонть эйстэ мон ней уш ковгак а туеван.

Правилась а пек покшоль. Тонавтнинь а пек куватьс. Эсень пачка тонавтнемс ульнесь седе шожда, а вана вайгельсэ… Валтнэ тапавильть, мерят налксильть мартон кекшнемкасо. Курок мон аноколень.

- Тонавтния! – сергединь тетянень.

- Ёвтнек.

Мон карминь ёвтнеме. Тетям саизе учебникем ды ванось ёвтнемам мельга. Ёвтния а пек видестэ, секс тетям венстизе тень одов книгам ды мерсь: «Ловнык седе внимательнойстэ ды тонавтник парсте».

Мон таго комавтыя прям книганть вельксс. Путынь весе виень ды окойники ульнинь анок.

- Тонавтния! – сергедия тетянь, сон яла телефонсоль.

- Стяк столенть экшстэ ды истя аштек, кода аштят стядо доска икеле ды ёвтнек, - мейле тетям саизе телевизоронь эйстэ пультонть ды нолдызе телевизоронть.

- Тетяй, кода мон карман ёвтнеме, зярдо телевизорсонть кортыть монденьгак пек, - энялдозевинь мон.

- А зярдо классо кармить шумамо, тон кода ёвтнесак правиланть? Тонавтнек ёвтнеме мезеяк лангс апак вано ды киньгак а маря.

- Чарькодинь, - ды ёвтния правиланть тетянень зярыяксть, секс мекс васенце попыткасто эзь ёвтневе.

- Молодец! – шнымем тетям.

- Ней эряви мездеяк тенек ярсамс. Мезе тосо анокстась ават? – кевкстимим тетям.

Ансяк авань пидемказо течи ульнесь вейке- ваньксчи эрьва кострулясо.

-Мезеяк, прякиненек улить, - эзь нусмакадо тетям. Сон пиксявсь ведь ды пидесь сывелень прякинеть. Озынек ярсамо. Эзинь кенере прякиненть кургс пачтямо, сон прок кортазевсь тетянь вайгельсэ: «Ёвтник правиланть.»

- Ней? Мезекс? – эзинь чарькоде мон ды кургонь автезь ванынь вишкинька, тантей, сывелень чинесэ качадыця, прякиненть лангс, мейле тетянь лангс.

- Секс, штобу а абунгадомс, зярдо тонавтыцясь кевкстсы кедьстэть правиланть, зярдо а учат, - толковась тень тетям.

Тетям мельспаросо нильнесь тантей ярсамканть. Мон жо нусманясто тензэ ёвтнинь тонавтнезь правиланть. Ёвтния таго зярыяксть, зярс эзинь вите весе ильведевкстнэнь. Прякинень тарелкасо нолдызь остатка тантей чинест, эзть куцтя уш судо варянгак. Сыньгак прок налкстасть учозь ды секскак сэтьмелгадсть. Окойники валтнэ весе стясть тарказост ды тетям шнымем.

- Ней ярсак!

«Пасиба»,- кежиявтозь мериксэлинь мон. Ансяк эзинь мере. Саия пенченть ды амельсэ карминь ярсамо.

Зярдо сась авам ды мон уш чевте таркасо мадезь эскелинь нееме васень он, тетям прок лия онсто сась ваксозон ды таго мерсь: «Эрька, Валерка, ёвтник правиланть.»

- Тетяй, монь удомам сась.

- Ёвтнек! – прок капитан командовась тетям.

- Мезекс, тетяй? – стакасто панжинь мон сельмень.

- Штобу а стувтомс сонзэ зярдояк!

Ды мон таго, ней уш мадезь, ёвтнинь правиланть. Ансяк аволь ламоксть. Тетям несь, мон чинзэ перть сизинь ды эряви уш тень оймсемс.

***

Зярдо омбоце чистэнть мон сынь школасто, тетям эзь аште диван лангсо, течи сон тейсь муськема машина. Шлямо нупальсэнть, совамо нупальсэнть ды пидема – панема нупальсэнть –эрьва косо кияксонть ацасть минень – сюнонь детальть.

- Кода, ёвтник правиланть? – сеске кевкстимем сон.

- Эзия. Мон венстинь- венстинь кедь, ансяк Лиля Наильевна прок эзимем редяяк.

- Мезеяк, кевкстянзат лия уроксто.

Сась авам. Вановтозо каятотсь таго апак ваньськавто пенч- вакантнэнь лангс. Чаравтызе прянзо, зярдо неинзе киякс лангсто машинань эйстэ деталень кумбонть ды мерсь: «Кода свал».

- Аволь, кода свал, течи тюленесь теи тонь кедень полавтыцят эйсэ,- витизе тетям авань.

- Зярдояк кудос сы сэтьмечи ды оймсема шка монь туртов, - ушодсь авам.

- Зяр-до-як! – морызе згилязь валонть тетям ды поладсь.- Валерка, течи максть теть тонавтнемс правила?

«Эзть максо, - манчиксэлинь мон, ансяк тетянь кевкстеманзо лангс отвечинь: «Максть.»

-Тонавтнесынек! – капитанонь вайгельсэ ёртсь тетям.

Мон стакасто ливтия коштом...

Адрес публикации: https://www.prodlenka.org/metodicheskie-razrabotki/274137-jovtnema-koda-mon-tonavtnin-pravila