Биржа труда

Хезмәт биржасы.

Максат:

Хезмәт моделенә нигезләнеп кешеләр хезмәте турында белемнәрен ныгыту.

Күмәк әңгәмәдә катнашу теләге уяту һәм үзенең фикерен әйтергә өйрәтү.

Әйберләргә карата системалы анализ бирергә өйрәтү.

“В” “Ф” хәрефләренең охшаш һәм аерма ягын күрсәтү.

Җиһазлау:

“Хезмәт” моделе, баскыч,һөнәрләр турында рәсемнәр, В-Ф хәрефләре, тегүче һөнәре буенча кием-салым (һәр балага).

Шөгыльнең барышы:

– Балалар, бүген без сезнең белән хезмәт һәм төрле һөнәр ияләре турында сөйләшербез. Мин хәзер сезгә җөмләләр әйтермен, ә сез аны тәмамлап, үз фикерегезне әйтерсез.

Табиб хезмәтенә мин хөрмәт белән карыйм, чөнки ул безне дәвалый, (чөнки үзем дә үскәч табиб булырга телим, чөнки ул ягымлы).

Мин очучы була алмыйм, чөнки мин кечкенә,(мин укытучы булырга телим, мин биеклектән куркам).

Мин пешерүче хезмәтен күзәтергә яратам, чөнки мин тәмле ашлар яратам, (минем әниемә булышасым килә, үзем дә пешерүче булырга телим).

Мин төзүче була алмыйм, чөнки мин кечкенә,(мин биеклектән куркам, мин шофер булырга телим).

Әйе, балалар, сез үз фикерләрегезне әйттегез. Миңа җавапларыгыз бик ошады. Без сезнең белән төрле һөнәр ияләре булып карадык. Балалар, күз алдына китерегез әле. Янәсе бер иртәдә сез 16 яшькә җиттегез. Сез кем булырга икән дип уйлый башладыгыз? Сез киңәшче итеп нәрсәне алыр идегез?

– Китапны, зурлар киңәшен, телевизор, радионы, хезмәт биржасын алыр идек.

– Әйе, без сезнең белән, күмәк киңәшкә килеп, хезмәт биржасын алабыз. Һәм компьютерлар залына керәбез. Экран – табышмак символ кнопкага гына басылып яна.

Экранны кабызабыз һәм баскыч. Беренче булып үзем кнопкага басам. Хезмәт моделе яна.

Әйдәгез әле, балалар, язуларның эчтәлеген табыйк.

Беренче баскыч У. Ул нәрсәне белдерә? Күз алдына китерегез әле, балалар бакчасыннан киткәндә сезнең бакчага бүләк ясыйсыгыз килә. Моның өчен нәрсә кирәк? (Уй). Димәк, беренче баскыч ул – уй. Без иң беренче уйлыйбыз.

Сез балалар бакчасына чәчәкләр утыртырга уйлыйсыз. Моның өчен нәрсә кирәк? (Орлык, җир, савыт). Димәк, М – материал кирәк.

Хәзер материалыбыз да бар. Аны утырттык, чәчәк үссен хәзер. Ул үсәме? Юк, үсми. Ә ни өчен? Аңа су сибәргә, төбен йомшартырга кирәк. Димәк Х – хезмәт куярга кирәк.

Ә хезмәтне башкару өчен безгә нәрсә кирәк? Көрәк (төбен йомшарту өчен), су сипкеч, чиләк кирәк. Димәк, Э – эш кораллары кирәк икән. Менә без дүртенче баскычка да җиттек.

Безнең бөтенесе бар. Чәчәгебез үсте.Хәзер нәрсә эшлибез?Нәтиҗә ясыйбыз–Н. Әйе, бишенче баскычка мендек. Эш процессларының өлешләрен тагын бер кат әйтегез һәм 5 баскычка да менегез.

–Уй, материал, хезмәт, эш кораллары, нәтиҗә.

–Күз алдына китерегез әле, без матур чәчәкле үсемлек утыртырга уйладык. Эшләргә әйбер бар. Эшли дә беләбез. Уйлаган эшне без эшли алабызмы?

–Юк, чөнки безнең материалыбыз юк. Димәк, һәр нәрсә үз урынына кирәк.

–Балалар, менә без сезнең белән хезмәт баскычына мендек. Ә хәзер мин тагын кнопкага басам. Без монда нәрсә күрәбез? Әйе, рәссам үзенең рәсемнәрен ташлар белән каплаган. Ә без бу ташларның нинди фигурага яки нәрсәгә охшаганын әйтергә тиешбез. Һәм без рәссамнең нинди рәсем ясаганын белербез. Карагыз әле, менә бу таш нәрсәгә охшаган? (Эткә, мәчегә, ишәккә).

–Ә бу таш? (тупка, шарга, чәчәккә)

–Ә бусы? (күбәләккә, бантикка, самолетка).

–Ә менә бу таш? (еланга, елгага, тасмага, суалчанга).

–Ә бусы? (яфракка, агачка, көймәгә).

–Ә бу таш нәрсәгә охшаган? (балыкка, кеше аяк киеменә һәм эзенә).

–Әйе, балалар, сез барыгыз да үз фикерләрегезне әйттегез. Һәм без рәссамның рәсемен ачтык. Ул бик матур итеп рәсем ясаган икән.

Балалар, мин тагын кнопкага басам. Бу эш коралы кайсы һөнәр иясенә кирәк?

–Секретарь–машинисткага.

–Ә ул нәрсә эшли?

–Ул хәрефләрдән сүзләр, җөмләләр җыя

–Ә хәзер без аңа булышырбыз. Ул кайбер сүзләрдә я беренче, я ахыргы хәрефен төшереп калдырган. Игътибар белән тыңлагыз әле.

Хезмәт,китап,чәч,тегүче сүзләрендә беренче хәрефләрен төшереп калдырган. Х,К,Ч,Т.

Ә бу сүзләрдә соңгы хәрефне төшереп калдырган: рәссам, тәрәзә, ишек, урындык, М,Ә,К,К.

–Әйе, балалар, сез бик зирәк булып чыктыгыз. Шулай итеп, без секретарь–машинисткага хатасын табарга булыштык.

Балалар, мин тагын кнопкага басам. Бу бик кызыклы рәсем. Ул кайсы һөнәр иясенә кирәк?(Табибка).

–Әйе, ул табибка кирәк.

Балалар, тыңлагыз әле, бер кызыклы шигырь укып үтәм:

Кар ява, бөтен җирне тутыра,

Агачларда табиблар утыра.

Бу шигырьдә кайсы сүз дөрес түгел? (Табиблар).

–Әйе, агачларда кошлар утыра.

Кар ява, бөтен җирне тутыра,

Агачларда кошлар утыра.

Балалар, сез бик күп хаталарны таптыгыз, ә хәзер бераз ял итеп алыйк.

Адрес публикации: https://www.prodlenka.org/metodicheskie-razrabotki/35358-birzha-truda