Ахуыргæнæн изложени «Мила»

Ахуыргæнæн изложени «Мила»
Мæ фыд фыййау уыдис, стæй цуанон. Иухатт нын уæтæрæй къæбыла æрхаста. Уый уыдис хъилхъус, цæрдæг æмæ цырддзаст. Æрмæст йæ бырынкъ, цыма йын æй исчи сæгæй айсæрста, уыйау мил дардта. Мила дæр æй уымæ гæсгæ схуыдтам. Йæ номæй-иу æм куы фæдзырдтон, уæд-иу мæм æрбазгъордта æмæ-иу мæ разы йæ фæстæгтыл алæууыд, йæ дыууæ цæсты-иу фырцинæй цæхæртæ калдтой. Тынг мыл сахуыр. Кæдæмфæнды цыдаин, æдзухдæр мæ фæдыл цыди. Мæхæдæг дæр æм дзæбæх кастæн, хæринаг хъуаг æй нæ уагътон.
Бонтæ цыдысты. Мила дæр сыстыр. Хион æмæ æддагон æвзарынмæ афтæ дæсны уыд, æмæ йыл кæд дисæй нæ мардтæн. Хæдзаронтæй алкæуыл дæр æнувыд уыд. Мидæмæ никæй уагъта. Нæхимæ-иу куы ничи уыд, уæд нæ хæдзармæ мæ зæрдæ никуы æхсайдта.
Баба сфæнд кодта Милайы ацы сæрд уæтæрмæ йемæ акæнын. Уадз æмæ, дам, мын уым мæ фос хъахъхъæна.
-Мæн дæр уæтæрмæ фæнды Милаимæ, - мæ фæндон загътон мæ фыдæн. Нæ разы кæны мæ фыд, фæндагыл, дам, нæ бафæраздзынæ. Йæ цæуын афон куы ‘рхæццæ, уæд Миламæ фæдзырдта. Куыдз йæ фæдыл араст, фæлæ фæстæмæ фæкæс-фæкæс кодта мæнмæ. Мæ фыд нын фæтæригъæд кодта. Афарста мæ: «Цæй, уæд та рацæуис?» Æз уайтагъд абæлццон дæн. Милайы цинæн кæрон нал уыдис. Афтæмæй схæццæ стæм уæтæрмæ.