Открытый урок «Валсюлмавксто чарькодема»

Конспект урока по родному языку в 5 классе

Уроконь темась: «Валсюлмавксто чарькодемась. Валсюлмавкссо прявт ды аволь

прявт валтнэ».

Уроконь типесь: од содамочинь вешнемань урок.

Уроконь тонавтомань целесь: теемс тонавтницятнень содавиксэкс валсюлмавк сонть марто; кастомс сынст содамочист ды маштомачист валсюлмавкстонть, сонзэ теевемадонть.

Уроконь задачатне:

-кемекстамс ды седе келейгавтомс тонавтницятнень содамочист валрисьмесэ валонь сюлмавоманть коряс;

-тонавтомс эйкакштнэнь валонь сюлмавксонь тееме, валсюлмавксонтень ванномань тееме;

-тонавтомс тонавтницятнень кортамсто ды сёрмадомсто анок валонь сюлмавкстнэнь тевс нолдамо.

Топавтовикс маштомачитне (УУД)

предметэнь коряс (предметнойть):

-содамс, мезе истямо валсюлмавксось, кода сон тееви; смустень ды грамматикань коряс сюлмавомань ёнкстнэде;

-маштомс валсюлмавксонь тееме, валрисьместэ сынст явомо, эйстэст прявт ды аволь прявт валтнэнь мукшномо, схемаст тееме;

личностнойть:

-вечкемс ды ванстомс тиринь келенть;

-маштомс питнень максомо эсь важодемантень;

-тонадомс тонавтнемань тувталтнэнь чарькодеме, тонавтнемантень мелень ванстомо;

метапредметнойть:

-маштомс эсь тевтеемантень целень путомо;

-видестэ, эрявикс лувсо эсь тевтеематнень ветямо;

-маштомс тонавтниця ялгатнень ды тонавтыцянть марто вейсэнь важодемань ветямо;

-маштомс эрявикс информациянь кочкамо.

Важодемань форматне: фронтальной, индивидуальной, самостоятельной.

Темань коряс чарькодематне: валсюлмавксось, прявт ды аволь прявт валтнэ, смустень ды грамматикань коряс сюлмавкстнэ.

Кедьёнкстнэ: компьютер, проектор, экран, презентация, карточкат, доскас сёрмадовкст; «Эрзянь кель», 5 класс. – Учебной пособия общеобразовательной организациятненень/ Д. В. Цыганкин. – Саранск: Мордовской книжной издательствась, 2010 ие.

Уроконть молемазо

I.Организационной моментэсь

-Шумбратадо, эйкакшт. Мон кенярдан неемс тынк весень паро ёжосо. Минь ушодсынек мартонк течинь уроконок.

-Панжинк тетраденк. Сёрмадынк течинь числанть. Классо важодема.

II.Уроконь темас совавтомась ды целень путомась.

-Эйкакшт, течинь уроконь теманть содамга тыненк эряви отвечамс кевкстема лангс.

-Варштадо экранонть лангс (1-це слайд). Кинь тынь нетядо? (цёрыне)

-А ней давайте цёрыне валонтень кочкатано смустень коряс ладиця прилагательнойть, конат лездыть тенек невтемс, кодамо те цёрынесь (2-це слайд).

Сюлминк сынстцёрыневалонть марто.

пизьгатаев – пизьгатаев цёрыне

вишкине - вишкине цёрыне

-Мезть лиссть валтнэнь вейкест-вейкест марто сюлмамодо мейле?

(валонь сюлмавкст)

-Виде. Валонь сюлмавкст. Течинь уроксто минь тынк марто сынст эйстэ карматано кортамо.

-Сёрмадынк уроконь теманть: «Валсюлмавсто чарькодема. Валсюлмавкссо прявт ды аволь прявт валтнэ». (3-це слайд).

-Арсезеведе теманть лемензэ лангсо. Кода тынь сонзэ чарькодьсынк. Ёвтынк эсенк меленк, мезень тееме минь карматано те теманть тонавтнемстэ.

(тонавтницятнень мелест ёвтамось)

Уроконь целень путомась (тонавтыцясь):

-течи минь тынк марто сайтяно валсюлмавксто чарькодема, вансынек сонзэ ёнксонзо; тонавтнетяно валрисьместэ валсюлмавксонь явомо; валсюлмавкссо прявт ды аволь прявт валтнэнь мукшномо, сынст схемаст тейнеме; вансынек, мейсэ явови валсюлмавксось валонть ды валрисьменть эйстэ.

III.Од содамочинь панжомась

(4-це слайд)

1. -Ваннынк сёрмадовкстнэнь, максодо каршо вал (ответ) максозь кевкстематнень лангс (21-це упр.)

мастор тиринь мастор

казне питней казне

уемс уемс шождынестэ

анокстамс анокстамс телентень

ловномс ловномс книга

кужо мазый кужо

-Мейсэ явовить неть сёрмадовкстнэ?

-Кона пеле сёрмадовкстнэ седе келейстэ ды чарькодевиксстэ невтить предметтнэнь ды тевтеематнень? (вить пелетне)

-Сюлмавозь-арась вить пеле валтнэ эсь ютковаст?

Теевивывод: вить пеле сёрмадовкстнэ улить валсюлмавксокс. Сынь валонь коряс седе видестэ невтить чарькодематнень. Валтнэ эйсэст сюлмазь смустень коряс.

2. –А ней давайте вансынек, кода теевить валсюлмавкстнэ (5-це слайд).

Штобу максомс каршо вал те кевкстеманть лангс, мусынек прявт ды аволь прявт валтнэнь неть валсюлмавкстнэсэ. Тень туртов путодо кевкстемат. Валось, конанть эйстэ путови кевкстемась, - прявт вал, омбоцесь жо, конантень путови кевкстемась, - аволь прявт вал.

тиринь (кодамо?) мастор, питней (кодамо?) казне,

уемс (кода?) шождынестэ, анокстамс (мезентень?) телентень,

ловномс (мезе?) книга, мазый (кодамо?) кужо

-Минь тынк марто невтинек валсюлмавкссо смустень коряс сюлмавоманть. Валсюлмавксонь ванномсто прявт валонть вельксэс путови тешкс (×) ды сёрмадови кевкстемась, конась путови аволь прявт валонтень. (невтеви схемань теемась)

Тейтяновывод: валсюлмавксось ашти кавто пельксстэ:прявт, конанть эйстэ путови кевкстемась, дыаволь прявт, конась отвечи те кевкстеманть лангс.

IV.Васенце кемекстамо толковамо марто.

1.Валсюлмавксонь теема (6-це слайд)

Карточка марто важодема.

Кармавтомась: ловнынк.

Кемемс, тетя; сёрмадозь, пор, ручка; ютамс, вирь; варштамс, верькс; серьгедемс, ава; вастовомс, ялга, марто; марямс, леля, пельде; теемс, парсте; вастомс, чокшне; прядомс, шка.

Арсемань туртов (проблемной) кевкстема.

-Кармить – а кармить неть валонь куротне валсюлмавксокс? Мекс?

(а кармить, неть валтнэ апак сюлма эсь ютковаст.)

-Тейсынек сынст валсюлмавксокс. Тень туртов тыненк эряви путомс кевкстемат, полавтомс падежень суффикстнэнь, совавтомс, ков эряви, валмельгакстнэнь.

(теевить валсюлмавкстнэ)

Кемемс (кинень?) тетянень, сёрмадозь (мейсэ?) порсо, сёрмадомс (мейсэ?) ручкасо, ютамс (кува?) вирьга, варштамс (ков?) верев, серьгедемс (кинень?) аванень, вастовомс (кинь марто?) ялгань марто, марямс (кинь пельде?) лелянь пельде, теемс (кода?) парсте, вастомс (зярдо?) чокшне, прядомс (зярдо?) шкасто.

Тейтяновывод: прявт ды аволь прявт валтнэ сюлмавить эсь ютковаст смустень ды грамматикань коряс. Смустень коряс сюлмавомась чарькодеви кевкстема вельде.

-Максодо чарькодема валсюлмавксто.

-Эсь ютковаст сюлмавозь кавто ды седе ламо валтнэнень мерить валсюлмавкс. Сон ашти кавто пельксстэ: прявт, конанть эйстэ путови кевкстема, ды аволь прявт, конась атвечи те кевкстеманть лангс.

2.Учебник марто важодема.

-Ней панжсынек учебниктнень (11 стр.) ды ловносынек параграфонть.

Кевкстема: (7-це слайд)

-Весе ли минь ёвтынек? Мезде мартонк эзинек кортне?

(тонавтницятнень ответэст)

- Аволь прявт валось прявт валонть марто сюлмави аволь ансяк смустень, но грамматикань коряскак. Те сюлмавксось невтеви валонь полавтниця суффикс ды валмельгакс вельде. Невтемга:

лисемс школасто, якамс вирьга,мелявтыаванзо кисэ, молян кстый мельга

V.Панжозь содамочитнень тевтеемас нолдамось

1. -Эйкакшт, минь карминек содамо, мезе истямо валсюлмавксось, кода муеви валсюлмавкссо валтнэнь ютксо сюлмавомась. Ней миненек эряви тонадомс мукшномо ды явомо сынст валрисьместэ. (8-це слайд)

-Сёрмадтано валрисьме (доскас ды тетрадьс).

Уитьлоксейть.

-Муинк валрисьменть юронзо .

-Кодамо те валрисьмесь? (апак келейгавто)

-Кочкадо валт, конат чарькодевтьсызь подлежащеенть (мазый, ашо)

-А ней кочкадо валт, конат чарькодевтьсызь сказуемоенть (леенть куншкава, лейганть, ведьганть, сэтьместэ)

-А ней сёрмадсынек валрисьменть, эйзэнзэ лездыця валонь совавтозь.

Лейганть сэтьместэ уить мазый локсейть.

-Кодамо валрисьме лиссь? (келейгавтозь)

-Эйкакшт, келейгавтозь валрисьмесэнть явовить валсюлмавкст. Апак келейгавто валрисьмесэ жо валсюлмавкст а явовить, секс што валрисьмень прявт пелькстнэ (подлежащеесь ды сказуемоесь) валсюлмавксокс а улить.

-Давайте ней ливтьсынек валсюлмавкстнэнь сёрмадозь валрисьместэнть ды тейсынек сынст схемаст.

мазый (кодамо?) локсейть,

уить (кува?) лейганть,

уить (кода?) сэтьместэ

-А ней терявтодо путомс кевкстемат подлежащеенть эйстэ сказуемоентень ды мекевлангк. Путовить ли сынь? (а путовить)

Тейтяновывод: подлежащеесь ды сказуемоесь валсюлмавксокс а эрсить. Сынь теить валрисьмень юронть.

2.(9-це слайд)

Вирь

Пиче вирь

Пандочамаванть кувакасто таргавсь пиче виресь.

- Мейсэ вейкетьстявить неть сёрмадовкстнэ вейкест-вейкест марто? Ули ли ютксост явовома?

(весе сёрмадовкстнэсэ вастови вирь валось)

1)вирь – те вал, сон ансяк максы чарькодема предметтэнть;

2)пиче вирь – чарькодемась максови седе домкасто, неяви, што кортамось моли пиче вирде, но аволь лиядо (килеень, тумонь), но эйсэнзэ а ёвтави прядозь арсема, те –валсюлмавкс;

3)колмоце сёрмадовксось – валрисьме. Сон максы седе келей информация, ды эйсэнзэ ёвтави прядозь арсема.

Тейтяновывод: валсюлмавксось валонть эйстэ явови сеньсэ, што предметтнэнь, тевтеематнень, ёнкстнэнь валонть коряс чарькодевти седе келейстэ, но а ёвтави эйсэнзэ прядозь арсема. Валрисьмесэнть жо максови седе келей информация ды ёвтави прядозь арсема.

3. Текст марто важодема (10-це слайд)

1)Текстэнть ловномазо (26-це упр.).

Эрзянь келесь – эйкакшонь васень тиринь кель, конань вельде сон сови эрямос, касты превензэ, келейгавты пертьпелькска ванноманзо, эрямонть чарькодеманзо. Тиринь келесь - эрзятнень сюпавчист, оймест, седеест,кенярксост. Сюкпря тонеть, Эрзянь кель! Тонавтат минек тевень тееме, паронть ды беряненть нееме, эрямонь вечкеме ды ломанекс улеме, моронь морамо ды мазыйстэ эрямо.

Тонь тонавтомась – вийть эрзятнень седейсэ.

2)Кевкстематне:

-Вечксынк ли тынь минек тиринь келенть?

-Кода текстсэнть невтеви эрзянь келенть эрявиксчизэ минек туртов?

Вывод: тиринь келенть эряви ванстомс, апак визде кортамс эйсэнзэ. Тиринь келесь васняяк лезды чарькодемс пертьпельксэнть. Бути ванстсынек тиринь келенек, сестэ ванстсынек раськенек ды культуранок.

3) Сёрмадомс валрисьменть, конаньсэ ёвтави текстэнть прявт арсемазо.

Эрзянь келесь – эйкакшонь васень тиринь кель, конань вельде сон сови эрямос, касты превензэ, келейгавты пертьпелькска ванноманзо, эрямонть чарькодеманзо.

4)Явозь валтнэнень кочкамс смустень коряс ладиця валт, сёрмадомс теезь валсюлмавкстнэнь тетрадьс, невтемс эйсэст прявт валтнэнь.

Келейгавты (мезензэ?) ванноманзо, тиринь (кодамо?)келесь,

вийть(мейсэ?) седейсэ, эрзятнень (кинь?) сюпавчист, тонавтат(кинь?) минек

4. Самостоятельной важодема

25-це упражнениянть теемазо

(проверяви ялгацек)

VI.Уроконь коряс итогонь теемась

1.Фронтальной кевкстнема теманть коряс.

-Мезде минь кортынек течинь уроксо?

-Мезе кармиде содамо одонть? Мезес тонадыде?

-Мезде мерить валсюлмавкс?

-Кода валсюлмавкссо муевить прявт ды аволь прявт валтнэ?

-Мезесь валрисьмесэ а ули валсюлмавксокс?

-Кода чарькодинк теманть? Путодо эстенк оценка (питне) карандашсо (поля лангс).

2.А ней вансынек, видестэ ли тынь путынк эстенк оценкатнень (питнетнень)? (11-це слайд)

Сёрмадтано валрисьме.

Мон свал кортан тиринь кельсэ.

- Невтинк валрисьменть юронзо.

-Ливтинк эйстэнзэ валсюлмавкстнэнь, невтинк эйсэст прявт ды аволь прявт валтнэнь.

-Проверямось, оценкань путнемась.

VII.Кудов кармавтомась.

4-це параграфонть ловномс, валсюлмавксто чарькодеманть тонавтнемс,

27-це упражнениясь.

Адрес публикации: https://www.prodlenka.org/metodicheskie-razrabotki/527868-otkrytyj-urok-valsjulmavksto-charkodema